साइकल चढेर क्याम्पस र घर आवतजावत गर्ने विद्यार्थीलाई छात्रवृत्ति

१४ फागुन, सुर्खेत । साइकल चढेर क्याम्पस र घर आवतजावत गर्ने विद्यार्थीले छात्रवृत्ति पाउने भएका छन् ।  सुर्खेतको सिद्धपाइला क्याम्पसमा साइकल चढ्ने विद्यार्थीले २५ प्रतिशत छात्रवृत्ति पाउने भएका हुन् ।

प्रदेश राजधानी वीरेन्द्रनगरमा रहेको उक्त क्याम्पसले साइकल चढेर क्याम्पस र घर आवतजावत गर्ने विद्यार्थीलाई मासिक शुल्कमा २५ प्रतिशत छुट गर्ने घोषणा गरेको छ ।

विद्यार्थीहरू हरेक दिन साइकल चढेर क्याम्पसमा आवतजावत गरेमा मासिक शुल्कमा २५ प्रतिशत छुट दिने व्यवस्था गरिएको क्याम्पस प्रमुख उपेन्द्र सुवेदीले बताए ।

यो अभियानले पर्यावरणीय सन्तुलनसँगै इन्धनको समेत बचत हुने सुवेदीको विश्वास छ । क्याम्पस प्रमुख सुवेदीका अनुसार साढे ४ सय विद्यार्थी अध्ययनरत सिद्धपाइला क्याम्पसमा ४-५ जना विद्यार्थीले मात्रै साइकल चढ्ने गरेका छन् ।