राष्ट्रपतिद्धारा फागुन २३ गते संसद अधिवेशन आह्वान

१७ फागुन, काठमाडौं ।  राष्ट्रपति विद्यादेवी भण्डारीले यही फागुन २३ गते अपरान्ह् ४ बजे संसद्को अधिवेशन आह्वान गरेकी छन् । यसअघि आजै बिहान बसेको मन्त्रिपरिषद बैठकले राष्ट्रपति समक्ष यस्तो सिफारिश गरेको थियो ।

प्रधानमन्त्री केपी ओली पोखरा जानुअघि सरकारी निवासमा बसेको मन्त्रिपरिषद बैठकले यस्तो निर्णय गरेको हो । पुष ५ गते प्रधानमन्त्रीको सिफारिशमा राष्ट्रपति विद्यादेवी भण्डारीले प्रतिनिधिसभा विघटन गरी बैशाखको १७ र २७ गते दुई चरणमा निर्वाचन मिति घोषणा गरेकी थिइन् ।

उक्त निर्णयविरुद्ध सर्वाेच्च अदालतमा रिट निवेदन परेकोमा यही फागुन ११ गते पुनस्थापित भएको हो । अदालतले फैसलाको १३ दिन भित्र संसद्को अधिवेशन आह्वान गर्न सरकारका नाममा परमादेश जारी गरेको थियो । सोही बमोजिम सरकारले अधिवेशन डाक्न सिफारिश गरेको हो ।