मेरो ज्यान तलमाथि हुनसक्छः ओली

१७ फागुन,  पोखरा । प्रधानमन्त्री केपी ओलीले आफूमाथि कुनैपनि बेला शारीरिक हमला हुन सक्ने बताएकाछन् । कार्यकर्ताहरुसँगको अन्तरक्रियाका लागि आज यहाँ आइपुगेका ओलीले प्रचण्ड–माधव समूहतिर संकेत गर्दै कुनैपनि क्षण शारिरीक हमला हुन सक्ने आशंका प्रकट गरेका हुन् ।

म निरन्तर आन्दोनलमा छु , देश र जनता नै मेरो लक्ष्य हो,त्यसैले जस्तोसुकै परिस्थितिको सामना गर्न तयार छु–प्रधानमन्त्री ओलीले भने–अहिले विरोधीहरुले ममाथि पूरा शक्ति लगाएर प्रहार गरिरहेकाछन् , तर म डग्नेवाला छैन ।

त्यसैले मेरा ज्यान तलमाथि पर्न सक्छ भन्दै उनले तर राष्ट्र निर्माणको अभियानले भने निरन्तरता पाउने बताए । तपाईं कार्यकर्ताहरु आफ्नो अभियानमा निरन्तर लाग्नुहुनेछ , मैले कसैको डर र त्राशमा बाँच्नु पर्दैन , ढुक्क छ – उनले भने ।

आफू नभएपनि पार्टीमा अन्धकार नआउने भन्दै प्रधानमन्त्री ओलीले कार्यकर्ताले गौरव गर्ने पार्टी रहेकाले चिन्ता नलिएको धारणा राखे ।