राख्नेले हटाउन पनि सक्छः ओली

१७ फागुन, पोखरा । प्रधानमन्त्री केपी ओलीले प्रचण्ड–माधवहरुलाई आफूले नै यो हैसियत दिएको बताएका छन् । पार्टी कार्यकर्तासँगको भेटघाटका क्रममा ओलीले भने–मैले नै उनीहरुलाई नियुक्त गरेको हो ,त्यसैले हटाउने अधिकारपनि आफूसँग रहेको बुझ्नुप¥यो ।

संसदीय दलको प्रमुख सचेतकबाट देव गुरुङलाई बर्खास्त गरेको प्रसंग निकाल्दै उनले आवश्यक परे अरुलाई समेत हटाउने कानूनी हक आफूसँग रहेको चेतावनी दिए । उनीहरुको बर्बराहट यस्तै रहने हो भने केन्द्रीय सदस्य र सांसद्हरुलाई समेत हटाउन सक्ने उनले बताए ।

पार्टी एकताका क्रममा आफूले भागबण्डाका आधारमा उनीहरुलाई नियुक्त गरेको स्मरण गर्दै उनले भने – मैले आफूलाई केन्द्रमा राखिन ,तर औंला दिंदा डुँडुला नै निल्न खोज्ने ? यस्तै हो भने अब अरुलाई समेत कारबाही हुन सक्छ ।

पार्टीमा के पसेका थिए , भाँडभैलो सुरु गरिहाले प्रधानमन्त्री ओलीले भने – आन्दोलन नै धरापमा पार्ने, पार्टी कब्जा गर्ने हुँदा हुँदा अब त छिमेकलाई कम्फर्टेबल हुने गरी सरकार बनाउनेसम्म भन्न थालेकाछन्, त्यो हुन दिइने छैन, नेपाली जनतालाई कम्फर्टेबल हुने सरकार मात्र चाहिएको छ ।

राजनीतिमा यस्ता उतार चढाव भइरहन्छन्, तर आन्दोलन भने निरन्तर जारी रहनेछ भन्दै उनले प्रचण्ड–माधव समूह चोइटेर जालान् तर मूल पार्टीको नेतृत्व आफूले नै गर्ने उद्घोष उनले गरे ।