राप्रपाद्धारा काठमाडौंमा हुने महाधिवेशनकाे कार्यतालिका तय

१७ फागुन, काठमाडौं । राष्ट्रिय प्रजातन्त्र पार्टी ‘राप्रपा’ ले पार्टीको आगामी बैशाख २५ देखि २८ सम्म काठमाडौंमा हुने महाधिवेशनका लागि आवश्यक पर्ने ‘स्थानीय तहको परिषद तथा निर्वाचन निर्देशिका’ र ‘केन्द्रीय निर्वाचन समिति सम्बन्धि निर्देशिका’ पारित गरेको छ । सोमबार बसेको केन्द्रीय सचिवालय कार्य व्यवस्था समितिको बैठकले निर्वाचनको कार्यतालिका पनि तय गरेको छ ।

बैठकपछि पार्टीद्वारा जारी विज्ञप्तिमा वडा देखि जिल्ला तहसम्मको कार्यसमितिको निर्वाचन चैत मसान्तभित्र गरिसक्ने उल्लेख छ । त्यस्तै सक्रिय सदस्यता वितरण चैत १५ सम्म गर्ने, महाधिवेशन प्रतिनिधि निर्वाचन बैशाख १० सम्म गर्ने र प्रदेश कार्यसमिति निर्वाचन बैशाख १५ भित्र गरिसक्ने निर्णय बैठकले गरेको केन्द्रीय सचिवालयका प्रमुखद्वय ध्रुवबहादुर प्रधान र भास्कर भद्राद्वारा जारी विज्ञप्तिमा उल्लेख छ ।

त्यस्तै समायोजन गर्न बाँकी जिल्लाहरूको ७ दिनभित्र समायोजन गर्न पार्टीका नेता बुद्धिमान तामाङ, विक्रम पाण्डे, सचिवालय प्रमुखद्वय ध्रुवबहादुर प्रधान र भास्कर भद्रा सम्मिलित ४ सदस्यीय समिति बैठकले बनाएको छ ।

मितिः– २०७७ फागुन १७ गते

प्रेस विज्ञप्ती

राष्ट्रिय प्रजातन्त्र पार्टीका अध्यक्ष श्री कमल थापाको अध्यक्षतामा आज पार्टी केन्द्रीय कार्यालयमा बसेको केन्द्रीय सचिबालय कार्य व्यवस्था समितिको बैठकले देहाय बमोजिम निर्णय गरेको छ । १. राष्ट्रिय प्रजातन्त्र पार्टीको आगामी २०७८ बैशाख २५ देखि २८ सम्म काठमाडौंमा हुने महाधिवेशनलाई लक्षित गरि ‘स्थानीय तहको परिषद तथा निर्वाचन निर्देशिका’ र ‘केन्द्रीय निर्वाचन समिति सम्बन्धि निर्देशिका’ पारित गरियो । जस अन्तर्गतः क) जिल्ला निर्वाचन समितिको गठन २०७७ फागुन २५ भित्र गरिसक्ने । ख) सक्रिय सदस्यता वितरण अभियान लाई २०७७ चैत १५ सम्म म्याद थप गर्ने । ग) वडादेखि जिल्ला तहसम्मका कार्य समितिहरुको गठन चैत मसान्त सम्ममा गरिसक्ने । घ) महाधिवेशन प्रतिनिधिहरुको निर्वाचन २०७८ बैशाख १० भित्र सम्पन्न गर्ने । २. समायोजन बाँकी रहेका जिल्लाहरुको ७ दिन भित्र समायोजन गर्न पार्टीका नेताहरु बुद्धिमान तामाङ, विक्रम पाण्डे, ध्रुव बहादुर प्रधान र भास्कर भद्रा रहेको ४ सदस्यीय समिति गठन गरिएको छ ।

भास्कर भद्रा ध्रुव बहादुर प्रधान

प्रमुख प्रमुख केन्द्रीय सचिवालय, केन्द्रीय सचिवालय