नागरिक लगानी कोषको साढे ३ लाख कित्ता शेयरमा बुधवारदेखि आवेदन दिन सकिने

१८ फागुन, काठमाडौं । नागरिक लगानी कोषले नबिकेको हकप्रद शेयर बुधवारदेखि लिलामीमा विक्री गर्ने भएको छ ।

कम्पनीले सर्वसाधारण समूहको ३ लाख ५४ हजार १५० दशमलव ०५ कित्ता शेयर लिलामीमा ल्याउन लागेको हो । यस शेयर खरीद गर्न इच्छुक व्याक्ति, कम्पनी, संघ, संस्थाहरुले चैत २ गतेसम्म शिलबन्दी बोलपत्र पेश गर्न सक्नेछन् ।

उक्त शेयरको न्यूनतम मूल्य १०० तोकिएको हुँदा सो वा सोभन्दा बढी मूल्य अंकित गरी बोलकबोल गर्नु पर्नेछ ।

आवेदकले न्यूतम १० कित्ताको लागि आवेदन दिनु पर्नेछ भने अधिकतम शेयर संख्याको लागि कुनै हद नलाग्ने जानकारी गराएको हो । कम्पनीको विक्री प्रबन्धक आरविवि मर्चेण्ट एण्ड बैंकिङ लिमिटेड रहेको छ ।

साथै, राष्ट्रिय वाणिज्य बैंकका शाखा कार्यालयहरु वीरगञ्ज पर्सा, जनकपुर धनुषा, नारायणगढ, चितवन, बाग्लुङ, बुटवल, रुपन्देही, नेपालगञ्ज, बाँके वीरेन्द्रनगर, सुर्खेत, धनगढी, कैलाली, विर्तामोड झापा, हेटौडा, मकवानपुर, तुल्सीपुर दाङ, महेन्द्रनगर कञ्चनपुर र नागरिक लगानी कोष नयाँबानेश्वर, काठमाडौं तथा शाखा कार्यालयहरुमा आवेदन बुझाउन सक्नेछन् ।