कांग्रेसलाई प्रधानमन्त्री दिएर अघि बढ्ने नेपालकाे संकेत

१८ फागुन, मोरङ । नेकपाका दाहाल-नेपाल समूहका अध्यक्ष माधव कुमार नेपालले कांग्रेसलाई प्रधानमन्त्री दिएर अघि बढ्न सक्ने संकेत गरेका छन् । सोमबार प्रेस संगठन मोरङले आयोजना गरेको पत्रकार सम्मेलनमा बोल्दै नेता नेपालले नेपालका प्रमुख तीन पार्टी नेकपा, कांग्रेस र जनता समाजवादी पार्टीबीच बसेर छलफल गरेर अघि बढ्ने वताए । ‘

जनता समाजवादी पार्टीले के निर्णय गर्छ हेरौं,’ उनले भने, ‘त्यसपछि कांग्रेस र हामी बसेर छलफल गरेर सहमती गछौं ।’ नेता नेपालले कांग्रेसलाई कि तपाईहरु अविश्वासको प्रस्ताव दर्ता गराउनु होस् सँगै जाउ कि हामी दर्ता गछौं सँगै जाउ भनेर भनि सकेको बताए । यो देशकै प्रधानमन्त्री असुरक्षीत हुनु भनेको खतराको कुरा भएको उनको भनाइ छ । ओलीले सोमबार पोखरामा भएको सभालाई सम्बोधन गर्दै आफूमाथि सुरक्षा थ्रेट भएको बताएका थिए ।

सदनमा दर्ता भएको अविश्वासको प्रस्ताव के हुन्छ भन्‍ने सञ्चारकर्मीको प्रश्नमा नेता नेपालले भने, ‘अस्ती दर्ता भएको अविश्वासको प्रस्तावका बारेमा हामीले भन्‍ने कुरा भएन । त्यो हामीले संसद सचिवालयमा दर्ता गरी सकेका छौ । सर्वोच्च अदालतको फैसला आएको छ ।

त्यो फैसलाले त्यस अघिका सबै कुरा शून्य हुने हो भने त्यसको अर्थ नरहला त्यसबारेमा आधिकारी कुरा भन्‍न सक्ने अवस्था भएन् । त्यो संसद भित्रको कुरा हो त्यो संसद सचितवालयले नै मिलाउने कुरा भयो ।’ नेता नेपाल स्व.भारतमोहन अधिकारीको दोस्रो स्मृति सभामा सहभागि हुन विराटनगर पुगेका हुन् ।