आज नेकपा नाम विवादको फैसला सुनाइने

२० फागुन, काठमाडौं । आज नेकपा नाम विवादको फैसला सुनाइने भएकाे छ ।  सर्वोच्च अदालतले नेपाल कम्युनिस्ट पार्टीको नाममा रहेको विवादमा बिहीबार फैसला सुनाउने भएको हाे । गत बिहीबार न्यायाधीश बमकुमार श्रेष्ठ र कुमार रेग्मीको इजलासले उक्त मुद्दामा सुनुवाइ सकेर निर्णय सुनाउने मिति फागुन २० गतेलाई तोकेको हो ।

तत्कालीन नेकपा एमाले र नेकपा माओवादी केन्द्रबीच एकता भएपछि हालको सत्तारुढ दल निर्वाचन आयोगमा नेपाल कम्युनिस्ट पार्टी ‘नेकपा’ नाममा दर्ता भएको थियो । तर निर्वाचन आयोगमा त्यसअघि नै ऋषिराम कट्टेल नेतृत्वको नेपाल कम्युनिस्ट पार्टी दर्ता कायम थियो ।

आफ्नो पार्टीको नामसँग मिल्दोजुल्दो नाम राखिएको भन्दै कट्टेलले निर्वाचन आयोगलाई विपक्षी बनाएर २०७५ मंसिर ५ गते रिट निवेदन दर्ता गरेका थिए । आफ्नो पार्टीको नामसँग मिल्ने गरी केही संकेतमात्रै थपेर दल दर्ता गरिएको भन्दै कट्टेलले त्यसअघि निर्वाचन आयोगमा पनि उजुरी दिएका थिए । तर आयोगले कात्तिक ९ गते सत्तारुढ नेकपाकै पक्षमा निर्णय गरेको थियो । आयोगको सो निर्णयविरुद्ध कट्टेल सर्वोच्च अदालतमा पुगेका हुन् ।

 तर, बिहीबार तोकिएको पेशी लगभग निसु नहुने निश्चित भएको छ। सर्वोच्च अदालतका पूर्वप्रधानन्यायाधीश सुरेन्द्रप्रसाद सिंहको निधन भएकाले अदालत विदा गरिएको छ। सरकारले फागुन २३ गते प्रतिनिधि सभा बैठक बोलाएको छ। उक्त बैठकअघि फैसला आउने आस गरिएको थियो। तर, बिहीबार विदा भएकाले यो सम्भावना न्यून देखिएको छ। सार्वजनिक विदाको भोलिपल्टै पेशी राखिएमा भने प्रतिनिधि सभा बैठक अघि फैसला आउने सम्भावना रहन्छ। तर, एक साता भन्दा पछि सरेमा भने यो फैसला प्रतिनिधि सभाको बैठकभन्दा पछि जाने छ।