कांग्रेसले बाेलायाे आज केन्द्रिय पदाधिकारी बैठक

२० फागुन, काठमाडौं । नेपाली कांग्रेसको केन्द्रिय पदाधिकारी बैठक आज बस्दै छ । पुनःस्थापित संसद बैठकमा कसरी प्रस्तुत हुने भन्नेबारे छलफल गर्न नेपाली कांग्रेसको पदाधिकारी बैठक बस्न लागेको हो ।

बैठक पार्टी सभापति शेरबहादुर देउवाको निवास बुढानीलकण्ठमा दिउँसो तीन बजे बस्ने छ । बैठकमा पूर्वपदाधिकारीहरु पनि सहभागी हुने भएका छन् ।  प्रधानमन्त्री केपी  ओलीको सिफारिसमा राष्ट्रपति विद्यादेवी भण्डारीले गत पुष ५ गते संसद बैठक विघटन गरेकी थिइन् ।

सर्वोच्च अदालतले भने यही फागुन ११ गते संसद विघटनको निर्णय असंवैधानिक ठहर गरेको थियो । सर्वोच्चले १३ दिनभित्र संसद बैठक आह्वान गर्न निर्देशन दिएअनुसार २३ गते अपराह्न ४ बजे संसद बैठक बस्दै छ ।

संसद बैठकमा कांग्रेस प्रधानमन्त्री ओलीको साथमा उभिन्छ कि प्रचण्ड-माधव पक्षमा भन्नेमा चासो छ । नयाँ सत्ता समीकरणमा कांग्रेस निर्णायक भूमिकामा छ ।