वामदेवले एकताको पक्षमा नआउने नेतालाई भोट नदिने

नेपालबहस संवाददाता

फागुन २०, २०७७ बिहिबार १९:४७:५२

२० फागुन, काठमाडौं । नेपाल कम्युनिस्ट पार्टी ‘नेकपा’ का उपाध्यक्ष वामदेव गौतमले प्रचण्ड–माधव पक्ष र ओली पक्षको दोस्रो तहका नेताहरूलाई एकताबद्ध गरी अभियान अगाडि बढाउने बताएका छन् ।

बिहीबार कोरोना भाइरसविरुद्धको खोप लगाउन नयाँ बानेश्वरस्थित सिभिल अस्पताल पुगेका गौतमले सञ्चारकर्मीसँग कुरा गर्दै एकताको पक्षमा नहुने नेताहरुलाई भोट नदिनेसम्मको अवस्था सिर्जना गर्ने दाबी गरेका हुन् । केपी ओली र पुष्पकमल दाहाल प्रचण्ड अझैपनि एकताको पक्षको नआएको उनले बताए ।

‘धेरै ठाउँमा उहाँहरुले बोलेको सुन्दा एकताको पक्षमा दुवै अध्यक्ष अझै आइसक्नु भएको छैन । मेरो प्रयत्न के छ भने केपी ओलीतिर र प्रचण्डतिर रहेका दोस्रो तहका कमरेडहरुलाई एकताबद्ध गर्ने र तलबाट एकताको पक्षमा एउटा ठूलो पंक्ति तयार गर्ने हुनेछ,’ उनले भने, ‘एकताको पक्षमा जुन नेता हुनुहुन्न उहाँलाई भोट नदिने । यो अभियान अब हामीले चलाउँदै छौं, चारैतिरबाट यी दुईजना नेतालाई घेराबन्दी गर्न सकियो भने एकता गर्न सकिएला ।’

गौतमले ओली र प्रचण्डलाई एकताबद्ध गरे मात्रै नेकपा एक हुने र त्यसका लागि दुवै नेताका वरिपरि रहेकाहरुलाई साथमा लिनुपर्ने बताए । नेकपाको कुनै पनि समूहमा नलागी आफू एकता अभियानमा लाग्ने उनले स्पष्ट पारे ।

नेपालबहस संवाददाता

नेपालबहस डटकमको अंग्रेजी संस्करणका साथै अनलाइन टीभी पनि सञ्चालित छ । फेसबुक र ट्वीटरमार्फत पनि हामीसँग जोडिन सकिनेछ । नेपालबहसमा प्रकाशित कुनै सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला । धन्यवाद ।

लेखकबाट थप