प्रतिनिधिसभा बैठकमा नेकपाका दुवै समूह एकै ठाउँमा

२० फागुन, काठमाडौं । आगामी बैठकमा प्रतिनिधिसभाको बैठकमा नेकपाका दुवै समूहका सांसद बस्‍ने कुर्सी एउटै लहरमा बस्ने भएका छन् । कानुनी रूपमा विभाजन भइनसकेका कारण दुवै समूहलाई एकै ठाउँमा राख्‍ने तयारी संसद सचिवालयले गरेको हो ।

संसद सचिवालयका अनुसार दाहाल नेपाल समूहका सांसद सत्तापक्ष कै लाइनमा बस्‍ने भएका हुन् । प्रतिनिधि सभाको पहिलो रोमा सत्तारुढ नेकपाका दुवै समूहका सांसदहरू बस्‍नेछन्। त्यस्तै दोस्रो रो प्रमुख प्रतिपक्षी दल नेपाली कांग्रेसका सांसदहरूका लागि छुट्याइएको छ । त्यस्तै तस्रो रोमा जसपाका सांसदहरू बस्‍नको लागि कुर्सीहरू तयार पारिएको सचिवालयले जनाएको छ ।

संसद्को सातौँ अधिवेशनको सबै तयारी सकिएको छ । सरकारको प्रतिनिधि सभा विघटन गर्ने निर्णयलाई सर्वोच्च अदालतले उल्ट्याएपछि संसद् अधिवेशनको तयारी गरिएको हो ।

फागुन ११ गतेको सर्वोच्च फैसलाले १३ दिनमा संसद् बैठक संचालन गर्न आदेश दिएको थियो । फागुन २३ गते ४ बजे प्रतिनिधि सभाको बैठक बस्दैछ ।