सकसपूर्ण अवस्थामा माधव र झलनाथ

२४ फागुन, काठमाडौं । सर्वाेच्च अदालतले हिजो गरेको फैसलाले नेकपा एमाले भन्ने दल व्यूँतिएको छ । साथै, नेकपा माओवादी केन्द्र पनि पुरानै हैसियतमा आइपुगेको छ । कसैले नसोचेको राजनीतिक परिवेश निर्माण भएकाले अब कसरी अगाडि बढ्ने भन्ने चिन्ता पार्टी नेतृत्वलाई परेको छ ।

नेकपा भन्ने दल ऋषिराम कट्टेललाई दिने मात्र फैसला गरेको भए यतिको सकस पर्ने थिएन । तर पार्टी एकीकरण प्रकृया नै फेरि नयाँ शीराबाट थाल्न आदेश भएपछि त्यसको सम्भावना टरेको छ । फैसलाले थोरै गाह्रो नेकपा माओवादी केन्द्रलाई परेको छ । तर अस्तित्व नै धरापमा पर्ने अवस्था चाहिं पूर्व नेकपा एमालेका नेताहरुलाई परेको छ । यसमा माधवकुमार नेपाल,झलनाथ खनाललगायत रहेका छन् ।

राजनीतिक रुपमा यो फैसलाले केपी ओलीलाई केही राहत पुगेको छ । तर उनको सरकार पनि अब अल्पमतमा परेको छ । त्यसको व्यवस्थापनका लागि ओली देशैभरि नेकपा एमाले व्यूँताउने अभियानमा लागिसकेका छन् । नेता नेपाल र खनालहरु भने अब कसरी अगाडि बढ्ने भन्नेमा बढी चिन्तित देखिन्छन् । अदालतको आदेशले अब नेकपा एमालेमा फर्कनुको विकल्प छैन ।

या त फैसलाको पुनरावलोकन गर्न निवेदन दिनुप¥यो वा फैसला स्वीकार गर्नुप¥यो । पुनरावलोकन गर्ने तयारी गर्दापनि तत्काल अन्तरिम आदेश नआउने भएकाले नेपाल– खनालहरु एमालेमै फर्केर ओली प्रवृत्ति विरुद्ध संघर्ष गर्ने मनस्थितिमा पुगेका छन् । आज दिउँसो पूर्व एमाले सम्बद्ध आफू पक्षीय नेताहरुको भेलामा यो गुटले यस्तो निश्कर्ष निकालेको हो ।

त्यसपछि आजै प्रचण्ड–माधव समूहको स्थायी कमिटी बैठक अहिले माओवादी मुख्यालय रहेको पेरिसडाँडामा सुरु भएको छ । सम्भवतः यो समूहको यो बैठक नै अन्तिम हुनसक्छ । किनभने अब निर्वाचन आयोगले चाल्ने कदमका आधारमा भोलिदेखि एमाले र माओवादी केन्द्र औपचारिक रुपमा व्यूँतिन सक्ने अवस्था रहेको छ ।