एमाले अब दुई टुक्रा हुँदै

२४ फागुन, काठमाडौं । सर्वाेच्च अदालतले नेकपा एमाले ब्यूँताउने गरी हिजो फैसला दिएपछि नेताहरु आफ्नो पक्षमा बहुमत जुटाउन लागिपरेका छन् । पूर्व एमाले व्यूँतिएपछि सो पार्टीको अध्यक्ष केपी ओली नै भएकाले प्रतिद्वन्द्वी माधवकुमार नेपाल र झलनाथ खनालहरु आफ्नो पक्षमा बहुमत जुटाउने अभियानमा लागेका छन् ।

प्रधानमन्त्रीसमेत रहेका अध्यक्ष ओलीसँग लगभग राजनीतिक सम्बन्ध नै विच्छेद गरिसकेका नेता नेपाल र खनाल प्राविधिक रुपमा उनीसँग रहनुपर्ने अवस्थामा पुगेका छन् । तर हाललाई एमालेमै रहनु परेपनि त्यहाँसमेत आफ्नै बहुमत जुटाउने यो पक्षको दाबी रहेको छ ।

ओलीलाई नेकपाबाट निष्काशन गरेको प्रचण्ड–माधव समूहलाई फेरि बलियो बनाउने र एकीकृत रुपमा अघि बढ्न आफूहरु सक्षम रहेको दाबी उनीहरुको छ । यद्यपि हिजोको फैसलाबाट उत्साहित भएको ओली पक्ष भने अब नाकको चालले आफ्नै वरिपरी आउन बाध्य हुने बताइरहेका छन् । उनले आफ्नो सरकारविरुद्ध उभिने सांसद्हरुलाई ह्विप लगाएर बाध्य पार्ने नत्र सदस्यता नै खारेज गरिदिने तयारी गरेका छन् । तर नेता माधव नेपाल भने आफूहरुको अवस्था ओलीभन्दा सुदृढ रहेको बताइरहेका छन् ।

आज बेलुकी बसेको प्रचण्ड–माधव समूहको स्थायी कमिटी बैठकमा नेता नेपालले पूर्व एमाले भित्र केन्द्रीय कमिटीमा ओलीकै हाराहारी सदस्य रहेको फेहरिस्त पेश गरेका थिए । साथै, संसदीय दलमा पनि आफ्नो ४० प्रतिशत माथि मत रहेको बताएका थिए । बैठकमा नेता नेपालले हाललाई एमाले भित्र नै संघर्ष गर्ने र ओलीलाई विस्थापित गरेर प्रचण्डको टिमसँग फेरि एकीकरण गर्ने रणनीति सुनाएका थिए ।

नेता नेपालले ओली पक्षलाई पार्टीबाट बाहिरिन बाध्य पारिने पनि उल्लेख गरेका थिए । उनको भनाई मान्ने हो भने अब पूर्व नेकपा तीन चिरामा विभाजित हुनेछ । पूर्व एमाले दुई फ्याकमा बाँडिने भएपछि एकीकरण पछिको नेकपा पार्टी तीन टुक्रा हुने देखिएको हो ।