तयारी नपुगेकाले एमालेको सचिवालय बैठक स्थगित

२५ फागुन, काठमाडौं । एमालेको सचिवालय बैठक स्थगित भएको छ । मंगलबार बिहान बस्ने भनिएको नेकपा एमालेको सचिवालय बैठक तयारी नपुगेकाले स्थगित गरिएको स्रोतले जनाएको छ ।

माधव नेपाल, झलनाथ खनाल लगायतका नेताहरु एमालेमै फर्किने निर्णय गर्नुअघि नै एमाले महासचिव ईश्वर पोखरेलले मंगलबार बिहान ९ बजे सचिवालय बैठक आह्वान गरेका थिए । नेपाल, खनालसहितका नेताहरु एमालेमै फर्किने निर्णयमा पुगेपछि थप तयारीका लागि भन्दै बैठक स्थगित गरिएको हो ।

यो समितिमा ईश्वर पोखरेलको नेतृत्वमा दुई उपमहासचिव, पाँच सचिव र कार्यालय सचिव हुन्छन् । यो समितिले पार्टीको व्यवस्थापन लगायतका काम गर्दछ ।