ग्रीन लाइफको आईपीओ यो साता सूचीकृत गरिने

२५ फागुन, काठमाडौं । ग्रीन लाइफ हाइड्रोपावर कम्पनी लिमिटेडको आईपीओ यसै साता भित्रमा नेप्सेमा सूचिकृत हुने भएको छ । शेयर रजिष्टार सानिमा क्यापिटल लिमिटेडका अनुसार शेयर सूचीकरणका लागि नेप्सेमा पठाइसकेको छ ।

नेप्सेका सूचना अधिकारी मुराहरी पराजुलीले कम्पनीको आईपीओ सूचीकरणका लागि निवेदन आइसकेको र सबै कागजपत्रहरु पुगेको खण्डमा यसैसाता सूचीकरण सम्झौता हुने बताएको छन् । क्यापिटलका अनुसार आईपीओ आज अथवा भोलि भित्रमा लगानीकर्ताको हितग्राही खातामा जम्मा गरिनेछ ।

कम्पनीले माघ २३ गते, शुक्रबारदेखि माघ २७ गतेसम्म प्रतिकित्ता १०० रुपैयाँ अंकित दरमा ३४ करोड ९६ लाख ४० हजार रूपैयाँ बराबरको ३४ लाख ९६ हजार ४ सय कित्ता आईपीओ निष्कासन तथा बिक्री खुल्ला गरेको थियो ।