ओली अल्पमतमा परेपछि सत्ता टिकाउन जसपासँग नजिकिने प्रयास

२५ फागुन, काठमाडौं । प्रधानमन्त्री केपी ओली अल्पमतमा परेपछि सत्ता टिकाउन जनता समाजवादी पार्टीसँग नजिकिने प्रयास गरेका छन् । ओलीले जनता समाजवादी पार्टीले उठाउँदै आएका मुद्दा सम्बोधन गर्न भन्दै छलफलका लागि नेताहरू खटाएका छन् ।

गत आइतबार प्रधानमन्त्री केपी शर्मा ओली र जनता समाजवादी पार्टीका अध्यक्ष महन्थ ठाकुरबीच प्रधानमन्त्री निवास बालुवाटारमा तत्कालीन राष्ट्रिय जनता समाजवादी पार्टीका सांसद रेशम चौधरीको रिहाइ, जसपाले उठाएको नागरिकताको मुद्दा र जलेश्‍वर घटनाका सम्बन्धमा छलफल भएको थियो । दुई जनाबीचको छलफलले यी विषय टुंग्याउन दुवै पक्षका नेताहरूलाई जिम्मेवारी दिने सहमति बनेको थियो ।

प्रधानमन्त्री ओलीले पूर्वसभामुख सुवासचन्द्र नेम्वाङ, अर्थमन्त्री विष्णु पौडेल र प्रधानमन्त्रीका परराष्ट्र सल्लाहकार डा. राजन भट्टराईलाई छलफलको जिम्मेवारी दिएका थिए । ठाकुरले पार्टीका नेताद्वय शर्वेन्द्रनाथ शुक्ल र लक्ष्मणलाल कर्णलाई जिम्मेवारी दिएका थिए । दुवै पक्षका वार्ता टोलीबीच सोमबार यी विषय कसरी सल्टाउने भन्ने विषयमा छलफल भएको छ ।

सर्वोच्च अदालतले नेकपा एमाले र नेकपा माओवादी केन्द्रबीचको एकीकरणलाई मान्यता नदिएपछि अब संसदमा दुबै दल पूर्व दलको हैसियतमै क्रियाशील हुने भएका छन् । वर्तमान केपी शर्मा ओली नेतृत्वको सरकार कायम राख्न एमालेले अर्को दलको साथ लिनुपर्नेछ ।