सरकारमा सहभागी मन्त्री फिर्ता बोलाउने माओवादी केन्द्रको निर्णय

२९ फागुन, काठमाडौं । नेकपा माओवादी केन्द्रले सरकारमा रहेका आफ्ना मन्त्रीलाई फिर्ता बोलाउने निर्णय गरेको छ । पेरिसडाँडामा बसेको स्थायी कमिटी बैठकले गृहमन्त्री रामबहादुर थापा बादलसहितका मन्त्रीलाई फिर्ता बोलाउने निर्णय गरेको हो ।

यस्तै बैठकले नेकपा एमालेको केन्द्रीय सदस्यमा मनोनयन भएका नेतालाई २४ घण्टाभित्र स्पष्टीकरण दिनसमेत निर्देशन दिएको पार्टी प्रवक्ता नारायण काजी श्रेष्ठले जानकारी दिए । एमाले अध्यक्ष एवम् प्रधानमन्त्री केपी शर्मा ओलीले हिजोमात्र बादलसहित २३ जनालाई एमालेको केन्द्रीय सदस्य मनोनयन गरेका थिए ।

माओवादी केन्द्रका गृहमन्त्री बादलसहित उद्योग, वाणिज्य तथा आपूर्तिमन्त्री लेखराज भट्ट, ऊर्जामन्त्री टोपबहादुर रायमाझी, खानेपानीमन्त्री मणि थापा, सिँचाइमन्त्री प्रभु साह, खेलकुदमन्त्री दावा लामा र श्रममन्त्री गौरीशंकर चौधरी सरकारमा छन् ।