पौडेलको ‘विगत र वर्तमान’ कविता सङ्ग्रह बजारमा

४ चैत,दमौली । तनहुँको शुक्लागण्डकी नगरपालिका–४ दुलेगौँडा निवासी टीकाराम पौडेलले ८४ औं जन्मदिनको अवसरमा कविता सङ्ग्रह बजारमा ल्याएका छन् । पौडेलले आफ्नो पहिलो कृति ‘विगत र वर्तमान’ कविता सङ्ग्रह बजारमा ल्याएका हुन् ।

कविता सङ्ग्रहको गण्डकी प्रदेशसभा सदस्य राजीव पहारीले विमोचन गरे । सो अवसरमा प्रदेशसभा सदस्य पहारीले मानवीय जीवनको अभिव्यक्ति नै साहित्य भएको चर्चा गरे । गण्डकी प्रदेश साहित्य, कला र संस्कृतिको उद्गमस्थल भएको पहारीको भनाइ थियो ।

चौरासी पुष्ठ लामो कविता सङ्ग्रहमा ८४ कविता सङ्ग्रृहीत छन् । शुक्ला साहित्य सङ्गम तनहुँले प्रकाशन गरेको सङ्ग्रहमा संस्कृति, संस्कार, विकृति, विसङ्गतिका विषयलाई समावेश गरिएको छ । बुबाको सिर्जनालाई जीवन्त राख्न पुस्तक नै प्रकाशन गरेको टीकारामका छोरा मोतीप्रसाद पौडेलले बताए । “उनले पहिल्यैदेखि कविता लेख्थ्ये । कविता लेख्ने थन्क्याउँदै राख्थ्ये, त्यसैलाई पुस्तकको रुप दिइएको हो,” उनले भने। पोखरा महानगरपालिकास्थित भलाममा जन्मिनुभएका दुलेगौँडा निवासी पौडेल पूर्व शिक्षक समेत हुन् ।