नेप्सेमा एक करोड १३ लाख कित्ता शेयर सूचीकृत

चैत ६, काठमाडौं । नेप्सेमा तीन कम्पनीको शेयर सूचीकृत भएको छ ।  नेप्सेमा नेपाल बंगलादेश बैंक, सेन्चुरी कर्मशियल बैंक र महिला सहयात्रा लघुवित्त वित्तीय संस्थाको बोनस शेयर सूचीकृत भएको हो ।

नेपाल बंगलादेश बैंकको ५० लाख ६९ हजार ५८२ कित्ता बोनस शेयर र २२ हजार ८२९ हकप्रद शेयर सूचीकृत भएको छ । बैंकले गत आर्थिक वर्षको मुनाफाबाट शेयरधनीलाई ६ प्रतिशत बोनस शेयर वितरण गरेको थियो । उक्त बोनस शेयर बिहीबार नेप्सेमा सूचीकृत भएको हो ।

सेन्चुरी कर्मशियल बैंकको पनि ६१ लाख ८९ हजार ५७९.२६ कित्ता बोनस शेयर नेप्सेमा सूचीकृत भएको छ । गत आर्थिक वर्षको मुनाफाबाट यस बैंकले आफ्ना शेयरधनीलाई ५.२५ बोनस वितरण गरेको थियो ।

महिला सहयात्रा लघुवित्तको एक लाख २१ हजार कित्ता बोनस शेयर पनि सूचीकृत भएको छ । गत आर्थिक वर्षको मुनाफाबाट यस लघुवित्तले १० प्रतिशत बोनस शेयर शेयरधनीहरुलाई वितरण गरेको थियो जुन अहिले नेप्सेमा सूचिकृत भएको हो ।

यी तिनै कम्पनीको बोनस, शेयरधनीहरुको हितग्राहि खातामा आएपछि दोश्रो बजारमा कारोबार गर्न सकिनेछ ।