प्रतिनिधिसभा बैठक : कोइरालाको निधनमा शोक प्रस्ताव पारित

६ चैत, काठमाडौं । प्रतिनिधिसभाले सभामुख अग्नि सापकोटाले पूर्वसांसद एवं संविधान सभा सदस्य अशोक कोइरालाको निधनप्रति पेश गरेको शोक प्रस्तावलाई सर्वसम्मतिले पारित गरेको छ ।

बैठकले प्रजातन्त्र एवं लोकतन्त्र स्थापनाका लागि भएका आन्दोलनमा नेतृत्वदायी भूमिका निभाउनुभएका कोइरालाको ७१ वर्षको उमेरमा यही चैत ४ गते राति उपचारका क्रममा असामयिक निधन भएकामा शोक प्रकट गर्दै श्रद्धाञ्जलि अर्पण गरेको छ ।

सदनले शोक सन्तप्त परिवारजनप्रति समवेदना प्रकट गरेको छ । कोइराला २०५८ सालमा राष्ट्रियसभा सदस्य, विसं २०६३ को पुनःस्थापित प्रतिनिधि सभा सदस्य एवं २०७० सालको संविधान सभा सदस्य निर्वाचनमा नेपाली कांग्रेसको तर्फबाट समानुपातिकका रुपमा निर्वाचित सदस्य थिए । सभाले उनको सम्मानमा एक मिनेट मौनधारणसमेत गरेको थियो । प्रतिनिधिसभाको अर्को बैठक यही चैत १० गते मंगलबार दिनको १ बजे बस्‍नेछ ।