गिरिजाप्रसाद कोइरालाको स्मृतिदिवस विविध कार्यक्रम गरी मनाइँदै

७ चैत, काठमाडौं । नेपाली कांग्रेसका पूर्वसभापति तथा पूर्वप्रधानमन्त्री गिरिजाप्रसाद कोइरालाको स्मृतिदिवस आज विविध कार्यक्रम गरी मनाइँदैछ । कोइरालालाई नेपालको शान्ति प्रक्रियाको नायकको रुपमा लिइन्छ ।

उनकै नेतृत्वमा तत्कालीन विद्रोही समूह नेकपा माओवादीलाई मुलधारको राजनीतिमा ल्याउँदै राष्ट्रिय राजनीतिको कोशेढुंगाका रुपमा रहेको बिस्तृत शान्ति सम्झौता भएको थियो । कोइरालाकै अगुवाईमा २०६२/६३ सालको दोस्रो जनआन्दोलन सफल भएको थियो।

जीवनको ६० वर्षभन्दा धेरै समय राजनीतिमा संलग्न भएका कोइरालाको जन्म १९८१ असार १८ गते भारत बिहारमा भएको थियो । नेपाली राजनीतिमा कोइरालाको योगदानलाई अतुलनीय रहेको भन्दै स्मरण गर्ने गरिन्छ।

कोइरालाको २०६६ साल चैत ७ गते निधन भएको थियो। चार पटक प्रधानमन्त्री भएका कोइराला गणतन्त्र नेपालको पहिलो प्रधानमन्त्री समेत हुन्।