एमाले संसदीय दल र केन्द्रीय कमिटीको बैठक बस्दै, नेपाल-खनाल पक्ष सहभागी नहुने

७ चैत, काठमाडौं । नेकपा एमालेको संसदीय दल र केन्द्रीय कमिटीको बैठक आज बस्दैछ । संसदीय दलको बैठक विहान साढे १० बजे र केन्द्रीय कमिटीको बैठक मध्याह्न १२ बजे प्रधानमन्त्री निवास बालुवाटारमा बस्न लागेको हो । बालुवाटारमा बोलाइएको दुवै बैठकमा वरिष्ठ नेता झलनाथ खनाल र माधवकुमार नेपाल पक्ष भने सहभागी नहुने भएको छ।

यस अघि बोलाइएको संसदीय दलको बैठकमा पनि नेपाल खनाल पक्षा सहभागी भएको थिएन । बैठक बालुवाटारमा बोलाइएको र फागुन २८ को निर्णय फिर्ता नगरिएको भन्दै  नेपाल – खनाल पक्षले बैठक बहिस्कार गरेको हो ।

बैठकले संसदीय दलको विधान संशोधन गर्ने तयारी छ । दलको विधान २०७२ कै छ, जसमा भएका कतिपय व्यवस्था नयाँ संविधानअनुसार मिलाउनुपर्ने भएकाले दलको विधान संशोधन गरिने प्रमुख सचेतक विशाल भट्टराईले जानकारी दिए । संशोधित विधान दलको केन्द्रीय कमिटीबाट अनुमोदन गर्ने बताइएको छ ।