ओली नेतृत्वको बैठकले पाँच नेतालाई स्पष्टीकरण सोध्ने

७ चैत, काठमाडौं । नेकपा एमालेका अध्यक्ष केपी ओली नेतृत्वको बैठकले पाँच नेतालाई स्पष्टीकरण सोध्ने भएको छ । बालुवाटारमा शनिबार बसेको  संसदीय दलको बैठकले पाँच नेतालाई स्पष्टीकरण सोध्ने निर्णय गरेको हो ।

बैठकको निर्णय अनुसार वरिष्ठ नेता माधवकुमार नेपाल र नेताहरु भीम रावल, सुरेन्द्र पाण्डे, घनश्याम भुसाल र रामकुमारी झाँक्रीलाई स्पष्टीकरण सोधिने बताइएकाे छ ।

शनिबार बालुवाटारमा बसेको ओली पक्षीय संसदीय दलको बैठकले संघीय तथा प्रदेश सभाका समानुपातिक सांसदहरुको बन्द सूचीमा रहेको नाम हटाउने, राख्ने या हेरफेर गर्ने अधिकार प्रधानमन्त्री ओलीलाई प्रत्यायोजन गर्ने निर्णय पनि गरेको छ।

यस्तै पार्टी केन्द्रीय कमिटी तथा मातहत कमिटीको सदस्यहरुको विदाई, मनोनयन तथा कारबाही गर्ने अधिकार ओलीलाई प्रत्यायोजन गर्ने निर्णय बैठकले गरेको छ। बैठकले अदालत, निर्वाचन आयोग र अन्य आधिकारिक निकाय पार्टीको तर्फबाट गर्ने सबै काम पार्टी अध्यक्षलाई अख्तियारी दिने निर्णय पनि गरेको छ।

उनीहरूमाथि पार्टी हितविपरीत काम गरेको आरोप लगाइएको छ । बैठकमा अध्यक्ष केपी ओलीले पार्टीमा गुटबन्दी अस्वीकार्य हुने बताएका थिए । पार्टी विधानअनुसार नचलेको भन्दै नेपाल–खनाल पक्षले बैठक बहिष्कार गरेको थियो ।