मधुवनका असई यादव असुल्नमै व्यस्त

९ चैत, कलैया । बाराको मधुवन प्रहरी चौकीका प्रमुख प्रहरी सहायक निरीक्षक (असई) मनोज यादवले भर्खरै सरुवा भएर आएका एसपी दीपेन्द्र शाहीलाई महिनावारी दिनुपर्ने भन्दै काठ तस्कर र रक्सी भट्टी संचालकहरुसँग रकम असुली गरेको खबर छ ।

स्थानीय दीपक मण्डलका अनुसार असई यादवले वन मुद्दा लगाएत अन्य अपराधमा पक्राउ पुर्जी जारी भएका व्यक्तिहरुसँग महिनावारी असुल्दै अपराधीहरुको संरक्षकत्व गरिरहेकाले स्थानीय त्रसित भएको बताउँछन् ।

बाराको गढीमाई जाने बाटो समेत मधुवन चौकीमा परेको र जिल्लाको उत्तरी नाका रतनपुरीका साथै मकवानपुरबाट भारतीय तस्करहरुले गाँजा चरेशको समेत तस्करी सोही बाटोबाट गर्ने गरेको एक प्रहरीले नाम नछाप्ने शर्तमा बताए ।

केही समय पहिले मात्र बारा पुगेका एसपी दीपेन्द्र शाहीको बदनाम गराउन हो वा उनको निर्देशनमा चौकी प्रमुखहरु लुटतन्त्रमा लागेका हुन त्यो भने समयले बताउने नागरिक समाज बाराका सदस्य पुरुषोत्तम साहले बताए ।

ती असईले नै राति गस्ती गरेर अवैध काठ लोड भएको टेक्ट्रर र साइकलमा तस्करी गराई स–मिलमा पुर्याउने गरेको स्वयं करैयाका एक तस्करले दावी गरेका छन् ।