राजधानीको आकाशमा प्रदुषणको तुवाँलो नहटदा उडान प्रभावित

१५ चैत, काठमाडौं । राजधानी काठमाडौं लगायतका स्थानमा देखिएको मौसम खरावीका कारण आजपनि आन्तरिक, बह्य उडानहरु प्रभावित हुन पुगेका छन् । दुई दिन यता राजधानी काठमाडौंको आकाशमा देखिएको बाक्लो धुवाँसहितको तुवाँलोले भिजिबिलिटी कम भएका कारण उडान प्रभावित भएको हो ।

त्रिभुवन विमानस्थल काठमाडौंबाट आज विहानका लागि तय भएका आन्तरिक उडान अझै सुचारु हुन सकेका छैनन् । मौसम खराबीले आन्तरिक तथा अन्तरराष्ट्रिय दुवै उडान प्रभावित भएकामा विमानस्थलले जनाएको छ । त्रिभुवन विमानस्थलको भिजिबिलिटी कम हुँदा भैरहवा, नेपालगंज, विराटनगर लगायतका अन्तरिक उडान हिजो अवेर मात्र संचालनमा आएका थिए । विहानको उडान तालिका अनुसार  काठमाडौंबाट अझैसम्म पनि आन्तरीक उडान नभएको गौतबुद्ध विमान स्थल भैरहवाका इन्जिनियर रविन्द्र कोइरालले जानकारी दिए। । “अहिले सम्म काठमाडौंबाट कुनै उडान हुन नसकेको बताइएको छ, काठमाडौंको मौसममा सुधार भए वेलुकासम्म केही उडान हुन सक्छ, कोइरालले भने।

यताःमौसम विज्ञान विभाग मौसम पूर्वानुमान महाशाखाले यो अवस्था कम्तिमा तीन, चार दिनसम्म रहन सक्ने बताएको छ । पानी नपरेसम्म वा ठुलो हावा हुरी नचलेसम्म यो मौसम सुधार हुने नदेखिएको महाशाखाले जनाएको छ ।  मकवानपुर, चितवन, पर्सालगायत जिल्लामा डढेलो लागिरहेको छ। यसैको प्रभावक काठमाडौंको आकाशमा प्रदुषण बढेको बताइएको छ ।   मौसम कहिले सफा हुने र डढेलो कहिले नियन्त्रणमा आउँछ भनेर अनुमान गर्न पनि सकिने अवस्था छैन ।