उपेन्द्रलाई देउवाको प्रश्न : तपाईकै पार्टीले ओलीसंग कुरा मिलाइरहेको छ, मैले के गर्नु ?

१९ चैत, काठमाडौं । नेपाली कांग्रेसका सभापति शेरबहादुर देउवाले जनता समाजवादी पार्टीका कारण  सत्ता समीकरण निर्माणमा विलम्व भएको र  निर्णय दिन नसकेको बताएका छन् । सत्ता समीकरणमा निर्णायक देखिएको जनता समाजवादी पार्टी नेपालका अध्यक्ष उपेन्द्र यादवले प्रधानमन्त्री केपी ओलीको विकल्पका लागि अग्रसरता लिन आग्रह गरिरहदा देउवाले यस्तो जवाफ दिएका हुन ।

कांग्रेस सभापति देउवासंगको भेटमा यादवले राजनीतिक अग्रसरता बढाउन आग्रह गरेका हुन् । सभापति देउवाले भने पछिल्लो राजनीतिक परिस्थितिबारे आफू राम्ररी जानकार रहेको भन्दै वैकल्पिक सरकार गठनका लागि वातावरण नबनेको जवाफ दिए । मुलत जसपाकै कारण परिस्थिति निर्माण नभएको देउवाको बुझाँइ छ ।  अहिलेको सरकार हटाउन पहल गरी कांग्रेसकै नेतृत्वमा अगाडि बढने प्रस्ताव यादवले गरिरहदा देउवाले  तपाईकै पार्टीले ओलीसंग कुरा मिलाइरहेको छ । मैले के गर्नु ?‘भनि जवाफ दिएको बताइएको छ ।

यादवले जसपाभित्र प्रधानमन्त्री ओलीले खेल्न खोजेको भएपनि आफूहरु ओलीको विकल्प खोज्ने पक्षमा एकमत रहेको विश्वास देउवालाई दिलाउने प्रयास गरेका थिए । जवाफमा देउवाले जसपाले ओलीसंग नमिल्ने औपचारिक निर्णय नगरेसम्म आफू अगाडि नबढ्ने जवाफ दिएका छन् । यता जसपाका अर्का अध्यक्ष महन्थ ठाकुर  र राजेन्ख्र महतो पक्ष भने प्रधानमन्त्री ओलीसंगै सहकार्यको पक्षमा उभिदै लगातार संवादमा रहेका छन् ।