एमाले नेपाल-खनालपक्षको स्थायी कमिटी बैठक बस्दै

२०, चैत,काठमाडौं । नेकपा एमालेको माधव नेपाल–झलनाथ खनाल पक्षको स्थायी कमिटी बैठक बस्दै छ ।  पार्टीका अध्यक्ष एवम् प्रधानमन्त्री केपी शर्मा ओलीले एक पछि अर्को गर्दै आफ्ना पक्षका नेतालाई धमाधम कारबाही गर्न थालेपछि रणनीति बनाउन नेपाल पक्षले आफूनिकट स्थायी कमिटी सदस्यहरूको बैठक गर्न लागेको हो। यस्तै बैठकमा पार्टी पुनर्गठनको अभियानलाई देशैभर कसरी लैजाने भन्ने विषयमा समेत छलफल हुने नेताहरुले बताएका छन् । बैठक बिहान ११ बजे बस्दै छ ।

पार्टी अध्यक्ष ओलीले फागुन २८ गते एकतर्फी बैठक बसाइ माओवादी नेताहरुको ब्यवस्थापन र नेपाल -खनाल पक्षका नेताहरुको जिम्मेवारी खोसेपछि नेपाल–खनाल पक्षले उक्त निर्णय फिर्ता लिन आग्रह गर्दै आएको छ । कुनै पनि हालतमा निर्णयबाट फिर्ता नहुने अडान ओलीले राखेपछि नेपाल-खनाल पक्ष राष्ट्रिय कार्यकर्ता भेलालगायत छुट्टै गतिविधि गरिरहेको छ, समानान्तर कमिटी बनाइरहेको छ। यही आरोपमा ओलीले नेपाल पक्षका नेपालसहित भीम रावल, सुरेन्द्र पाण्डे र घनश्याम भुसाललाई ६ महिनाका लागि भन्दै पार्टीको साधारण सदस्यतबाट समेत निलम्बन गरिसकेका छन्।