काठमाडौं महानगरको फोहर आजबाट उठाइने

२१ चैत, काठमाडौ ।  केहिदिन यता उठन नसकेको राजधानी काठमाडौं महानगरपालिको फोहोर आजबाट उठाइने भएको छ। काठमाडौं महानगरपालिका, सिसडोल क्षेत्रका आन्दोलनरत स्थानीय बासिन्दा र स्थानीय जनप्रतिनिधिबीच त्रिपक्षीय सहमती जुटेसँगै फोहर संकलन सूचारु हुने भएको हो ।

काठमाडौं महानगरपालिका वातावरण विभाग प्रमुख हरि श्रेष्ठका अनुसार शिक्षा र स्वास्थ्य सम्बन्धी मागहरु महानगरपालिकाले पुरा गर्ने सहमती भएपछि सिसडोलबासीले फोहोर बिसर्जनमा अवरोध नगर्ने  भएका हुन ।  सहमती अनुशार रोजगारी, विकास निर्माण लगायतका मागहरु सम्बन्धमा पनि काठमाडौं महानगरपालिकाले बजेट उपलब्ध गराउने भएको छ ।

ककनी गाउँपालिका अन्तर्गत रहेका विद्यालयहरुका लागि ४६ जना र धुनिबेसी नगरपालिकाका लागि ५ जना तहगत र विषयगत दरबन्दीमा सम्बन्धित गाउँपालिका र नगरपालिकाले करार सेवामा शिक्षक नियुक्त गर्ने र शिक्षक नियुक्ति भएपछि सो बापतको पारिश्रमिक नेपाल सरकारले तोकेको स्केल बमोजिमको रकम काठमाडौं महानगरपालिकाले उपलब्ध गराउने सहमति भएको छ।करार सेवामा नियुक्त हुने शिक्षकहरुको दरबन्दीमा स्थायी शिक्षक नियुक्त भएपश्चात महानगरपालिकाले उपलब्ध गराउन पर्ने छैन ।

नुवाकोट ककनी गाउँपालिका सिसडोल क्षेत्रका स्थानीय बासिन्दाले फोहोरमैला प्रभावित क्षेत्र शिक्षक व्यवस्थापन संघर्ष समिति बनाई विभिन्न माग राख्दै चैत १३ गते देखि फोहोर बिसर्जनमा अवरोध गर्दै आएका थिए।