नेपालमा कोरोना संक्रमण फेरि उच्च विन्दुमा पुग्ने : स्वास्थ्य मन्त्री त्रिपाठी

२३ चैत, काठमाडौं । पछिल्ला दिनहरुमा फेरि संक्रमण बढ्न थालेपछि स्वास्थ्य तथा जनसंख्यामन्त्री हृदयेश त्रिपाठीले जेठ असारमा संक्रमण अर्को उच्च विन्दुमा पुग्नसक्ने बताएका छन् । कोरोना भाइरसको संक्रमण आगामी जेठ–असारमा फेरि उच्च विन्दुमा पुग्नसक्ने उनले आंकलन गरेको हुन् ।

आइतबार संसद बैठकलाई सम्बोधन गर्दै त्रिपाठीले अबका दिनमा जनस्वास्थ्यका मापदण्ड पालनालाई प्रभावकारी बनाउन सकिएन भने संक्रमण बढ्दै जेठ असारमा अर्को उच्च विन्दुमा पुग्नसक्ने बताएका हुन् ।

भारतमा बढ्दो संक्रमणले नेपाललाई थप सचेत बनाएको समेत मन्त्री त्रिपाठीले बताए । पुनः लकडाउनमा जान नपरोस् भनेर अपनाउनुपर्ने सबै प्रभावकारी कदम अपनाउन सरकार तयार रहेको बताएका छन् । भारतमा संक्रमित बढ्दै गएको बताउँदै उनले आवागमनलाई व्यवस्थित गर्दै क्वारेन्टाइन र आइसोलेनका साथै जनस्वास्थ्यका मापदण्डलाई कडाइ गरिनुपर्नेमा जोड दिए ।

उनकाअनुसार झण्डै १८ लाख नागरिकलाई खोप दिइसकेको छ र असारसम्म ६० लाख जनतालाई दिने सरकारको लक्ष्य रहेको बताए । त्रिपाठीले खोप ल्याउन रकम अभाव नहुने चाडै कोरोनामा भएको खर्चको स्वेत पत्र जारी गर्ने प्रतिवद्धता समेत जनाएका छन् ।