माओवादी केन्द्रका चार सांसदले दल त्याग गरेको पत्र संसद सचिवालयमा

२४ चैत, काठमाडौं । नेकपा माओवादी केन्द्रले आफ्ना चार जना प्रतिनिधिसभाका सदस्यले  दल त्याग गरेको जानकारी गराउदै र कारवाही सहितको पत्र संसद सचिवालयमा दर्ता गरेको छ । माओवादी केन्द्रका अध्यक्ष एवम् संसदीय दलका नेता पुष्प कमल दाहाल ‘प्रचण्ड’ले अर्घाखाँचीबाट निर्वाचित टोपबहादुर रायमाझी, कैलाली–४ बाट निर्वाचित लेखराज भट्ट, रौतहट–३ बाट निर्वाचित प्रभु साह र कैलाली-३ बाट निर्वाचित गौरीशंकर चौधरीले दल त्याग गरेको र उनिहरुलाई कारवाही गरेको जानाकारी पत्र सचिवालयमा पठाएका हुन ।

माओवादी केन्द्रले दल त्यागको संघीय संसद सचिवालयमा पठाएसँगै उनिहरु अब सांसद नरहने पक्का भएको छ । त्यसको औपचारीक जानकारी भने  सदन समक्ष गराउनु पर्ने छ । राजनीतिक दल सम्वन्धी कानूनले दल त्याग गरेमा त्यस्तो सांसदको पद स्वत खारेज हुने ब्यवस्था गरेको छ ।

दल त्याग गरेको जानकारी पठाएका चारै जना सांसद सर्वोच्चको निर्णय पछि नेकपा एमाले प्रवेश गरेका छन् । चारै जना बहालवाला मन्त्री छन् । रायमाझी ऊर्जा, जलस्रोत तथा सिञ्चाइ, साह शहरी विकास र चौधरी श्रम, रोजगार तथा सामाजिक सुरक्षामन्त्री छन् ।

अब प्रधानमन्त्रीले  चारै जनालाई मन्त्री पदमा निरन्तरता दिन चाहे संघीय संसदको सदस्य नभएका व्यक्तिलाई मन्त्री नियुक्त गर्न सक्ने संविधानको धारा ७८ अनुसार पुन:नियुक्ति गर्नुपर्छ । नभए उनिहरु संसदको सदस्य नभएकाले स्वत पदमुक्त हुने संवैधानिक ब्यवस्था छ ।