राइस कुकरमा लुकाएर ल्याएको सुन विमानस्थलबाट बरामद

२५ चैत, काठमाडौँ । त्रिभुवन विमानस्थल भन्सार कार्यालयले खाना पकाउने राइस कुकरमा लुकाएर ल्याएको सुन बरामद गरेको छ ।दुबईबाट आएका धनुषाका प्रगास महराले ल्याएको ८ सय ८४ ग्राम सुनसहित सुन भन्सार जाँच गर्दा बरामत भएको त्रिभुवन विमानस्थल भन्सार कार्यालयले जनाएको छ ।

फ्लाई दुबईबाट आएका महराले कुकरको भित्रपट्टि पिँधमा सुन फिट गरेर ल्याएका थिए । कुकर खोलेर हेर्दा पनि लुकाएको पत्ता नलाग्ने गरी फिट गरेको सुन एक्सरे मेसिनमा देखिएपछि विमानस्थलमा खटिएका प्रहरी र भन्सार कर्मचारीले फोडेर हेरेका थिए ।

महरा धनुषाको मिथिला नगरपालिकाका स्थानीय हुन् । कुकर कम्पनीमा नै सो सुन फिट गरेको हुनसक्ने अनुसन्धानमा संलग्न अधिकारीहरु बताउँछन् ।