भुकम्पपछि खोटाङका १ सय ६ अपाङ्गमैत्री र महिलामैत्री विद्यालयमा भवन निर्माण

२८ चैत, काठमाडौं ।  खोटाङमा १ सय ६ वटा सामुदायिक विद्यालयमा नयाँ भवनहरु निर्माण भएका छन् । २०७२ सालको भूकम्पपछि क्षति पुगेका १ सय ६१ वटा विद्यालय भवनहरुमध्ये अपाङ्गमैत्री र महिलामैत्री १ सय ६ विद्यालयहरुम भवन निर्माण सम्पन्न भएका हुन् ।

भूकम्पपछि अस्थाई रुपमा स्थापित जिल्ला आयोजना कार्यन्वयन इकाई (शिक्षा)ले ९२ वटा र गैर सरकारी संस्थाले १४ वटा भवन निर्माण सम्पन्न गरेको इकाई प्रमुख बाबुराम पोखरेलले जानकारी दिए ।

राष्ट्रिय पुर्ननिर्माणको डिजाईन र ड्रोइङ अनुसार दुई कोठे ४६ वटा, तीन कोठे १६ वटा र चार कोठे ३० वटा विद्यालय भवन निर्माण भएको छ । वाँकी भवनहरुको काम आगामी असार मसान्तभित्र सम्पन्न हुने इकाई प्रमुख पोखरेलले बताए ।

इकाईले चारकोठे भवन निर्माणका लागि ७० लाख ४० हजार, तीनकोठे भवनका लागि ३५ लाख ८० हजार, दुईकोठे भवन निर्माणका लागि २३ लाख ९० हजार वजेट विद्यालय व्यवस्थापन समितिलाई उपलब्ध गराएर भवन निर्माण गरेको हो ।