बिद्यालय बन्द गर्ने सरकारी तयारीप्रति प्याब्सनद्धारा बिरोध

२९ चैत, काठमाडौं । कोरोना कहरले फेरि दोस्रो वेभ लिन थालेको भन्दै सरकारले सरकारी तथा निजी विद्यालय कम्तिमा तीन साताका लागि बन्द गर्ने तयारी गरेकोमा निजी क्षेत्रका विद्यालय सञ्चालकले विरोध गरेका छन् ।

कोरोनाको दोस्रो लहर सुरु भएको र ससाना बालबालिकासमेत संक्रमणको शिकार हुन थालेको भन्दै हिजो मात्रै कोभिड १९ संकट व्यवस्थापन केन्द्र एमसीसीले यस्तो सिफारिश गरेकोमा निजी क्षेत्रको प्रतिनिधि संस्था प्याब्सनले स्वास्थ सावधानी अपनाएर विद्यालय खोल्नुपर्ने धारणा राखेको छ ।

प्याब्सनले विज्ञप्ति जारी गर्दै भनेको छ – विद्यालयलाई बढी भन्दा बढी सुरक्षित बनाएर सञ्चालन गर्न सक्दा मात्रै शैक्षिक वातावरणसमेत सुधार र गुणस्तरीय हुने देखिन्छ ।

सबै शिक्षालयहरुमा अध्ययनरत विद्यार्थीहरुलाई स्वास्थ्य सावधानीका उपायहरु अवलम्बन गर्न गराउन विशेष भूमिका निर्वाह गर्न पनि प्याब्सनले सबै शिक्षक–कर्मचारीहरुलाई अनुरोध गरेको छ ।