सत्ता समीकरणको निर्णायक बैठक जारी

२९ चैत, काठमाडौं । गएको शुक्रबार नेपाली कांग्रेसका सभापति शेरबहादुर देउवाले बोलाएको त्रिदलीय बैठकमा प्रधानमन्त्री केपी ओलीको विकल्प दिन आफू तयार रहेको बताएका थिए । त्यसका लागि उनले माओवादी केन्द्र र जनता समाजवादी पार्टीको साथ र समर्थन मागे ।

कांग्रेस सभापति देउवाको प्रस्तावमा माओवादी केन्द्रले तत्कालै सहमति जनायो र, ओली सरकारविरुद्ध अविश्वास प्रस्ताव दर्ता गरिहाल्नुपर्ने धारणा राख्यो । तर सत्ता समीकरणको साँचो बोकेर बसेको जसपा नेताहरु भने अन्कनाए । उनीहरुले एक दुई दिनमै यसबारे निर्णय दिने बताएर बिदाबारी भए ।

देउवा निवासबाट निस्किएका जसपा नेताहरु बीच बाटामै महाराजगञ्जस्थित एक नेताको घरमा बसेर छलफल गरे । स्रोतका अनुसार, नेताहरुले ओली वा देउवा भन्ने भन्दा पनि आफू नेतृत्वको सरकार बनाउने पहल गर्ने निर्णय गरे ।

कांग्रेस सभापति देउवा ओली सरकारविरुद्ध जाने मनस्थितिमा नरहेको र उनले गर्ने काम भन्दा आफ्नै नेतृत्वमा सरकार बनाउन पाए धेरै काम गर्न सकिने निश्कर्ष नेताहरुको थियो । साथै, ओलीको सरकारमा जानु पार्टीका लागि घातक हुने ठहर गर्दै पहिलो प्राथमिकता आफ्नै नेतृत्व नभए मात्र देउवालाई अगाडि बढाउनुपर्ने पक्षमा नेताहरु पुगेका छन् ।

कांग्रेसको मनस्थिति बुझेरै जसपाले आजका लागि औपचारिक बैठक डाकेको हो । बैठक गर्नुअघि बाबुराम डा. भट्टराईले आजै बिहान कांग्रेस सभापति देउवालाई फोन गरी नयाँ समीकरण बनाउन अग्रसर हुन वा आफूलाई समर्थन गर्न आग्रह गरे । देउवाले पनि आजै पदाधिकारी बैठक राखेर निर्णय दिने बताएका छन् । सोही बमोजिम दुबै पार्टीको औपचारिक बैठक सुरु भएको छ ।

जसपाले बालकुमारीस्थित आफ्नो कार्यालयमा बैठक बोलाएको छ । बैठकमा ६ जना शीर्ष नेताहरु सहभागी छन् । जसमा डा.  भट्टराई, उपेन्द्र यादव, महन्थ ठाकुर, राजेन्द्र महतो, अशोक राई र राजेन्द्र श्रेष्ठ सहभागी छन् । सम्भवतः आजको बैठकले सत्ता समीकरणबारे एउटा ठोस निर्णय निकाल्ने छ – स्रोतको दावी छ ।