डढेलो नियन्त्रणका लागि हेलिकप्टरको प्रयोग

२९ चैत, काठमाडौं । शिवपुरी राष्ट्रिय निकुञ्जमा लागेको डढेलो नियन्त्रणमा लिन हेलीकोप्टर उँडाइएको छ । आज आइतबार बिहान करिब ११ बजे डढेलो लागेको अनुमान गरिएको छ । बुढानीलकण्ठ नगरपालिका–१ को तौलुङ क्षेत्रबाट आगलागी सुरु भएको बताइएको छ ।

आइतबार दिउँसो आगलागी भएपछि नियन्त्रणका लागि नेपाली सेना, नेपाल प्रहरी सशस्त्र प्रहरी र निकुञ्जका कर्मचारीले आगो नियन्त्रणको प्रयास गरिरहेको छन् ।

डढेलो नियन्त्रणमा लिन समस्या भएपछि हेलीकोप्टरमार्फत पानी खसालिएको छ । सिम्रिक एयरको हेलीकोप्टर उँडाएर पानी खसालिएको हो । सुन्दरीजलबाट पानी ल्याएर डढेलो नियन्त्रणको प्रयास गरिएको छ ।

हेलिकोप्टरले एक पटकमा ५ सय लिटर पानी बोक्न मिल्छ । दमकलले भेट्ने ठाउँबाहेकका क्षेत्रमा हेलिकोप्टरबाट पानी हालिएको हो । प्रहरीका अनुसार डढेलो वस्ती छेऊमा आउन लागेकाले त्यसक्षेत्रमा दमकल राखिएको छ ।