‘सफा हिमाल अभियान २०२१’ आजदेखि सुरु, ३५ टन फोहर सङ्कलन गर्ने लक्ष्य

३० चैत, काठमाडाैं । नेपाली सेनाको नेतृत्वमा आजदेखि ‘सफा हिमाल अभियान २०२१’ सुरु हुँदै छ । आजवाट सुरु भएको अभियान आउँदो जेठ २२ गते अर्थात जुन ५ मा विश्व वातावरण दिवसको अवसरमा समापन हुनेछ ।

नेपाली सेनाका प्रधान सेनापति पूर्णचन्द्र थापाले अभियमाकर्मीहरुलाई  ब्यानर हस्तान्तरण गरेर अभियानको शुभारम्भ गर्ने कार्यक्रम तय गरीएको छ ।

नेपाली सेनाले यो वर्ष विभिन्न निकायसँगको समन्वयमा सगरमाथा, ल्होत्से, पुमोरी, आमादब्लम, मकालु र धौलागिरि गरेर ६ वटा हिमाल सफाइ गर्दैछ । ६ वटा हिमालको बेस क्याम्प र त्यसभन्दा माथिको क्षेत्रमा सफाइ गरेर ३५ टन फोहर सङ्कलन गर्ने लक्ष्य रहेको सेनाले जनाएको छ ।

सफाइ अभियानमा वन तथा वातावरण मन्त्रालय, राष्ट्रिय निकुञ्ज तथा वन्यजन्तु संरक्षण विभाग, नेपाल पर्यटन बोर्ड, पासाङ ल्हामु गाउँपालिका,थासाङ गाउँपालिका, मकालु वरुण गाउँपालिका, नेपाल पर्वतारोहण सङ्घ, हिमालयन रेस्क्यु एसोसिएशन, सगरमाथा प्रदूषण नियन्त्रण समितिको सहकार्य रहने नेपाली सेनाले जनाएको छ । दुई वर्षअघि मात्र नेपाली सेनाले सगरमाथाको सफाइ अभियान संचालन गरेको थियो ।