बुटवलमा कोरोनाबाट दुई जना संक्रमितको मृत्यु

३० चैत, बुटवल । रुपन्देहीको बुटवलस्थित कोरोना विशेष अस्पतालमा दुई जना कोभिड-१९ संक्रमितको मृत्यु भएको छ। मृत्यु हुनेमा प्यूठान जिल्लाको स्वर्गद्वारी-९ का ४३ वर्षीय पुरुष र रुपन्देहीको तिलोत्तमा-१ की ७१ वर्षीया महिला रहेको अस्पतालले जनाएको छ ।

प्यूठानका पुरुषलाई गत चैत १० गते पीसीआर रिपोर्ट पोजिटिभ आएपछि अस्पतालमा भर्ना गरिएको थियो । उनको आज बिहान ५ बजे निधन भएको अस्पतालले जनाएको छ ।

त्यस्तै चैत २३ गते भर्ना भएकी महिलाको बिहान ७ बजेर २३ मिनेटमा मृत्यु भएको  हाे । दुवै जनामा निमोनियाको समस्या रहेको अस्पतालले जनाएको छ । बुटवलमा आइतबार पनि नवलपरासीका एक सक्रमितको मृत्यु भएको थियो ।