आगामी जेठ-असारमा दैनिक ११ हजार संक्रमित हुने : मन्त्री त्रिपाठी

३१ चैत, काठमाडौं ।  कोरोना भाइरसको दोस्रो लहर सुरु भएपछि नेपाली जनजीवन फेरि संकटतर्फ धकेलिने सम्भावना सरकारले औंल्याएको छ । आज स्वास्थ मन्त्रालयमा आयोजित पत्रकार सम्मेलनमा स्वास्थमन्त्री हृदयेश त्रिपाठीले भने– नेपालका पनि अब संक्रमितको संख्या उच्च दरले बढ्ने संकेत मिलेको छ । यही दरले संक्रमण फैलने हो भने आगामी एक दुुई महिनामा दैनिक ११ हजारका दरले संक्रमण विस्तार हुने प्रक्षेपण गरिएको छ ।

जेठ र असारमा नेपालमा संक्रमणको उच्च विन्दूमा पुग्ने अनुमान गरिएको पनि मन्त्री त्रिपाठीले प्रष्ट्याए । सरकार सम्भावित संक्रमणबाट जोगिन तयार रहेको समेत उनले बताए । यसका लागि स्वास्थ मापदण्ड चाहिं सबैले अपनाउनै पर्छ ।

अहिले नयाँ भेरिएन्टको संक्रमण कलिला उमेरका मानिसमा समेत तीब्र ढंगले देखिएकाले त्यो चेन ब्रेक गर्नका लागि नै भएपनि हामीले विद्यालयको पठन पाठन कम्तिमा ३० दिन चाहिं रोक्नैपर्ने उनले बताए । यसबारे आगामी मन्त्रिपरिषद बैठकले निर्णय लिने जानकारी मन्त्री त्रिपाठीले दिए ।

विदेशबाट आएकाहरुलाई नाका नाकामा नै परीक्षण गरेर आवश्यकता अनुसार क्वारिण्टिन वा आइसोलेसनमा राख्ने व्यवस्था मिलाइएको पनि उनले बताए । भारतबाट आउनेहरुको मुख्य नाकामा कम्तिमा हजार जना राख्न मिल्ने होल्डिङ सेन्टर बनाउने तयारी तीब्र रुपमा भइरहेको जानकारी मन्त्री त्रिपाठीले दिए । यस्ता प्रयत्नले नै बन्दाबन्दी हुनबाट जोगाउने तरिका हो भन्दै उनले नत्र देश फेरि लकडाउनको स्थितिमा फस्न सक्ने चेतावनी दिए ।