कुटपिटबाट ६५ वर्षीय वृद्धको मृत्यु, छोरा पक्राउ

१ वैशाख, विराटनगर । विराटनगरमा कुटपिटबाट एक वृद्धको मृत्यु भएको छ । घरायसी विवादमा छोराले कुट्पिट गर्दा विराटनगर महानगरपालिका– ५ का ६५ वर्षीय काले साहको मृत्यु भएको प्रहरीले जनाएको छ ।

प्रहरीका अनुसार छोरा अजयले कालेमाथि गत चैत २६ गते निर्घात कुटपिट गरेका थिए । जिल्ला प्रहरी कार्यालय मोरङका प्रहरी उपरीक्षक सन्तोष खड्काका अनुसार बुधबार बिहान नोबेल मेडिकल कलेजमा काले साहको मृत्यु भएको हो ।

कुटपिटपछि फरार भएका अजयलाई प्रहरीले बुधबार नै पक्राउ गरेको छ । चैत २९ गते पनि छोराको कुटाइबाट विराटनगर महानगरपालिका– ८ का ५४ वर्षीय विको सहनी मुखियाको मृत्यु भएको थियो ।

शनिबार राति विवादका क्रममा माइलो छोरो रविले धकेल्दा विकोको घाँटीमा बासको भाटाले छेडेको थियो । उनको उपचारका क्रममा मृत्यु भएको हो ।