लुम्बिनीमा जसपा संसदीय दलको बैठक आज बस्दै

५ वैशाख, बुटवल । सरकार गठनका लागि केन्द्रमा झैं लुम्बिनी प्रदेशमा पनि निर्णायक भूमिका निर्वाह गर्ने अवस्थामा रहेको जनता समाजवादी पार्टी जसपाभित्र शक्ति संघर्ष बढ्दै गएको छ । प्रदेशमा निर्णायक मानिएको जसपाको संसदीय दलको बैठक आइतबार दिउँसो बस्दै छ ।

सरकारविरुद्ध अविश्वास प्रस्ताव ल्याउन नेपाली कांग्रेस, माओवादी केन्द्र र जसपाको संयुक्त बैठक बस्नुअघि जसपाको बैठक तय भएको हो ।६ जना सांसद रहेको जसपा संसदीय दल एक ढिक्का नहुँदा सरकारविरुद्ध ल्याउन खोजिएको अविश्वास प्रस्ताव टरेको थियो ।

लामो समय अनिर्णयको बन्दी बनेको जसपा संसदीय दलको बैठकले गर्ने निर्णयले मुख्यमन्त्री शंकर पोखरेल नेतृत्वको सरकार जोगिने वा ढल्ने छिनोफानो हुनेछ ।  प्रदेशसभामा रहेका जसपा नेपालका ६ सांसदमध्ये पाँचजना उपेन्द्र यादव पक्षका छन् ।

यादव नेतृत्वको साविकको दल संघीय समाजवादी पार्टीका ३ जना प्रत्यक्ष निर्वाचित सांसद छन् भने २ जना समानुपातिकतर्फबाट निर्वाचित भएका छन् । लुम्बिनी प्रदेशको सवालमा जसपाले उपेन्द्र यादवको चाहनाभन्दा बाहिर गएर भूमिका निर्वाह गर्न सक्ने सम्भावना देखिएको छैन । यद्यपि जसपाका सांसदहरुसँग व्यक्तिगत सम्झौता गर्दै सत्तारुढ एमालेले सरकार टिकाउन भूमिका निर्वाह गर्न सक्ने आँकलन गरिएको छ ।