महाधिवेशन सार्न देउवालाई ओलीले राखेको प्रस्तावमा नेता शेखरको प्रतिवाद

६ वैशाख, काठमाडौं । प्रधानमन्त्री केपी शर्मा ओलीले गत शनिवार बालुवाटारमा राखेको सर्वदलीय बैठकमा प्रमुख प्रतिपक्षी दल नेपाली कांग्रेस सभापति शेरबहादुर देउवालाई आशन्न महाधिवेशन सार्न गरेको प्रस्तावप्रति कांग्रेस नेता शेखर कोइरलाले कडा प्रतिवाद गरेका छन् ।

सोमवार विहान सामाजिक संजाल फेसबुकमा लेख्दै नेता कोइरालाले सर्वदलीय बैठकमा बिपक्षी दल कांग्रेस पार्टीको महाधिवेशनका बारेमा कुरा उठ्नु र प्रधानमन्त्रीले कांग्रेसको महाधिवेशन सर्न सक्ने भन्ने आशयको कुरा राख्नु दुर्भाग्यपूर्ण भएको भन्दै यसमा कसैको अमुर्त स्वार्थ स्वीकार्य नहुने स्पष्ट पारेका हुन ।

“प्रधानमन्त्रीको सरकारी निवासमा भएको सर्वदलीय बैठकमा बिपक्षी दल कांग्रेस पार्टीको महाधिवेशनका बारेमा कुरा उठ्नु र प्रधानमन्त्रीले कांग्रेसको महाधिवेशन सर्न सक्ने भन्ने आशयको कुरा राख्नु दुर्भाग्य हो । महाधिवेशन कांग्रेस पार्टीले गर्ने हो । यसमा कसैको अमुर्त स्वार्थ स्वीकार्य हुँदैन।’ कोइरालाले फेसबुकमा लेखेका छन् ।

शनिवारको सर्वदलीय बैठकमा कांग्रेस सभापति देउवालाई प्रधानमन्त्री ओलीले कांग्रेस महाधिवेशन सार्न प्रस्ताव गरेको विषय बाहिरिएपछि आशन्न महाधिवेशनमा सभापतिका आकांक्षी समेत रहेका नेता कोइरालाको यस्तो भनाइ बहिर आएको हो ।