शहरी क्षेत्रको विद्यालय बन्‍द गर्ने मन्त्रिपरिषदको निर्णय

६ वैशाख, काठमाडौं । कोरोना संक्रमणको जोखिम बढ्दै गएपछि सरकारले मुख्य शहरी क्षेत्रको विद्यालय बन्‍द गर्ने भएको छ । सोमबार प्रधानमन्त्री निवास बालुवाटारमा बसेको मन्त्रिपरिषद बैठकले विद्यालय बन्‍द गर्ने निर्णय गरेको हो ।

कोभिड-१९ संकट व्यवस्थापन केन्द्र ‘सीसीएमसी’ को सिफारिस अनुसार सरकारले मुख्य शहरी क्षेत्रको विद्यालय मात्रै बन्द गर्ने निर्णय गरेको हो ।

अति प्रभावित जिल्लाहरु काठमाडौं, ललितपुर, कास्की, रुपन्देही, चितवन, बाँके, पर्सा, भक्तपुर, कैलाली, मोरङ, दाङ, सुर्खेत, बारा र बाग्लुङका गरी १४ जिल्लाका विद्यालय वैशाखभर सार्वजनिक तथा निजी विद्यालय बन्द गर्ने निर्णय लिएको शिक्षामन्त्री कृष्णगोपाल श्रेष्ठले जानकारी दिए।

त्यस्तै संसद्‌को हिउँदे अधिवेशन आजबाट अन्त्य गर्ने मन्त्रिपरिषद्‌ बैठकले निर्णय गरेको छ । बैठकले राष्ट्रपति विद्यादेवी भण्डारीसमक्ष आज दिउँसो १ बजेदेखि अन्त्य गर्न सिफारिस गर्ने निर्णय गरेको एक मन्त्रीले जानकारी दिए ।