अनिश्चितकालका लागि बन्द भयो सुवेदीको ‘रजतपट र ग्ल्यामर गफ’

काठमाडौं । रंग पत्रकार प्रकाश सुवेदीले एपीवान टेलिभिजनमा संचालन गर्दै आएको ‘रजतपट र ग्ल्यामर गफ’ नामक मनोरञ्जनात्मक कार्यक्रम अनिश्चितकालका लागि स्थगित भएको छ । कार्यक्रम पटक पटक विवादित बनेपछि एपीवान बोर्डले कार्यक्रम अनिश्चितकालका लागि स्थगित गरेको हो ।

सुवेदीले कार्यक्रममा प्रशारण गरेका सामग्रीहरु निके नै विवादित हुने गरेका छन् । उनले कार्यक्रम ‘रजतपट’ मा नायिका शिल्पा पोखरेलको बिषयमा एउटा समाचार प्रशारण गरेका थिए । सो रिपोर्ट प्रशारण भएसँगै शिल्पाले आफ्नो चरित्र हत्या भएको भन्दै एपीवानमा उजुरी दिएकी थिइन् । शिल्पाको उजुरी परेपछि एपीवान बोर्ड बैठकले शिल्पाको अन्तरवार्ता बाहेक उनीसँग सम्बन्धित अरु कुनै पनि रिपोर्ट प्रशारण नगर्न सुवेदीलाई पत्र काटेको थियो ।

तर, सुवेदीले नै संचालन गर्दै आएका अर्को कार्यक्रम ‘ग्ल्यामर गफ’मा निर्माता छविराज ओझालाई ल्याएका थिए । त्यसपछि शिल्पाले कार्यक्रम नै बन्द गर्नुपर्ने भन्दै उजुरी दिएकी थिइन् ।

सुवेदीले यसअघि पनि कार्यक्रममा नायिका पूजा शर्मालाई लक्षीत गर्दै टिप्पणी गरेका थिए भने नायिका स्वस्तिमा खड्का र उनका श्रीमान् निश्चल बस्नेतमाथि पनि टिप्पणी गरेका थिए ।