निर्णायक छलफलमा जुटदै कांग्रेस र माओवादी

९ वैशाख, काठमाडौं । प्रधानमन्त्री केपी ओली विरुद्धको अविश्वासको प्रस्ताव दर्ता र माओवादी केन्द्रले ओली सरकारलाई दिएको समर्थन फिर्ता लिने विषयमा नेपाली कांग्रेस र माओवादी केन्द्र बीच निर्णायक छलफल  हुने भएको छ ।

छलफलका लागि माओवादी केन्द्रले अध्यक्ष पुष्प कमल दहाल प्रचण्डलाई सरकारलाई दिएको फिर्ता लिने विषयमा निर्णय गर्ने अधिकार दिएको छ भने नेपाली कांग्रेसको हिजो बसेको पदाधिकारी बैठकले ओली विरुद्ध अविश्वासको प्रस्ताव दर्ता गराउनु पर्ने निश्कर्ष निकाल्दै प्रचण्डसँग गर्न सभापति शेर बहादुर देउवालाई आग्रह गरेको छ ।

समर्थन फिर्ता र अविश्वासको प्रस्ताव दर्ता दुइ विषय एकै पटक अघि बढाइने गरी निर्णयमा पुग्ने तयारीमा नेताहरु जुटेका छन् । अबको एक दुइ दिन भित्र नै ओली नेतृत्वको सरकार विस्थापन गर्न प्रतिनिधिसभामा अविश्वासको प्रस्ताव ल्याइने भएको छ । माओवादीले समर्थन फिर्ता लिने निश्चित बनेको छ ।

आज भोली मै भित्रै निर्णायक बार्ता छलफल गरी निश्कर्षमा पुग्ने विषयमा दुई दल सहमत रहेको संभावत आजै दुइ दल बीच निर्णायक छलफल हुने माओवादी केन्द्रका एक नेताले जानकारी दिए । दुई दल बीच हुने निर्णायक बार्तावाट केही दिनभित्रै मुलुकको राजनीतिले कोल्टे फेर्ने कांग्रेस नेताहरुले बताएका छन् ।

अबको एक दुई दिनमै एमालेमा ओली पक्ष र खनाल–नेपाल पक्षबीचको संघर्षले पनि प्रष्ट दिशा लिने र त्यसले नयाँ सरकार गठनमा झन सहज बनाउदै लगेको कांग्रेस र माओवादी केन्द्रको विश्लेषण रहेको छ ।उता जसपाका अध्यक्ष महन्थ ठाकुर र राजेन्द्र महतोमा ओली पक्षमै रहदा जनता समाजबादी दल विभाजनको खतरा रहेपनि अर्का अध्यक्ष उपेन्द्र यादव र बाबुराम भट्टराई भने ओलीसँग जानुभन्दा पार्टी विभाजन गरेरै भए पनि नयाँ सरकार बनाउन तयार रहेका छन् ।