नेपाल बैंकको मुनाफा १३.३१ प्रतिशतले बढ्यो, प्रतिशेयर आम्दानीमा गिरावट

१३ बैशाख, काठमाडौं । नेपाल बैंक लिमिटेडले चालु आर्थिक वर्षको तेस्रो त्रैमासको अपरिष्कृत वित्तीय विवरण सार्वजनिक गरेको छ। विवरण अनुसार बैंकको मुनाफा बढेको छ ।

चालु आर्थिक वर्षका चैत मसान्तसम्ममा बैंकले २ अर्ब २६ करोड २२ लाख रुपैयाँ मुनाफा आर्जन गरेको छ। यो गत आर्थिक वर्षको सोही अवधिको तुलनामा १३.३१ प्रतिशत बढी हो। त्यस्तै, बैंकको ब्याज आम्दानी र सञ्चालन मुनाफा सामान्य बढेको छ ।

समीक्षा अवधिमा बैंकको ब्याज आम्दानी ११.७५ प्रतिशत बढेको हो भने सञ्चालन मुनाफा २९.७६ प्रतिशत बढेको छ। गत आर्थिक वर्षको चैत मसान्तसम्ममा ६ करोड १९ लाख रुपैयाँ ऋणात्मक रहेको बैंकको वितरणयोग्य मुनाफा चालु आर्थिक वर्षको सोही अवधिसम्ममा १ अर्ब ४७ करोड ४६ लाख रुपैयाँ धनात्मक भएको छ।

यस अवधिसम्ममा बैंकको नाफा बढेपनि प्रतिशेयर आम्दानी भने घटेको छ। गत आर्थिक वर्षको मुनाफाबाट १२ प्रतिशत बोनस शेयर वितरण गरी चुक्ता पुँजी १२ अर्ब ६३ करोड ६७ लाख रुपैयाँ पुर्याएको बैंकको प्रतिशेयर आम्दानी समीक्षा अवधिमा ३ रुपैयाँ २६ पैसा घटेर २३ रुपैयाँ ८७ पैसामा सीमित भएको छ।

सो अवधिसम्ममा बैंकको मूल्य आम्दानी अनुपात १९.२३ गुणा रहेको छ भने प्रतिशेयर नेटवर्थ २७० रुपैयाँ २२ पैसा रहेको छ।

गत आर्थिक वर्षको अन्त्यको तुलनामा चालु आर्थिक वर्षको सोही अवधिसम्ममा बैंकको जगेडा कोष १४.७४ प्रतिशत बढेको छ भने निक्षेप ७.१२ प्रतिशत र कर्जा लगानी २३.८४ प्रतिशत बढेको छ।