अब बिना मास्क सडकमा निस्किए दुईघण्टा होल्डिङमा !

१३ बैशाख, काठमाडौं । कोरोना भाइरस संक्रमण जोखिम उच्च भएपछि प्रहरीले मास्क नलगाई हिँड्नेलाई कडाइ गरेको छ । कोभिड–१९ संक्रमण रोकथाम तथा नियन्त्रणका लागि सरकारले लागू गरेको मापदण्ड पालना नगरेको भन्दै मास्क नलगाई हिँड्नेलाई प्रहरीले कडाइ गरेको हो ।

प्रहरीको मास्क खोई अभियान अन्तगर्त आज सोमबार विहान बिना मस्क हिँड्नेलाई प्रहरीले दुईघण्टा कलंकी चोकको होल्डिङ सेन्टरमा राखेको छ । महानगरीय ट्राफिक प्रहरी प्रभाग कलंकी र प्रहरी प्रभाग कलंकीले संयुक्त रुपमा चन्द्रागिरी र कलंकी क्षेत्रमा ‘मास्क खोई’ अभियान शुरु गरेका छन् । सो अभियान अन्तर्गत उपत्यका बाहिरिने र प्रवेश गर्ने सवारीका यात्रुलाई मास्क लगाउन आग्रह गरिएको छ ।

बिना मास्क सडकमा निस्कनेलाई दुईघण्टा होल्डिङ सेन्टरमा राखेर मास्क प्रयोगबारे सचेत गराइएको कलंकी महानगरीय प्रहरी प्रभाग कलंकीले जनाएको छ । समाचार तयार पार्दासम्म कलंकी चोकमा त्यसरी बिना मास्क हिँड्ने २१ जनालाई होल्डिङमा राखेर छाडिएको छ ।

यसैबीच, मास्क नलगाउनेहरूलाई राख्न प्रहरीले काठमाडौंका सडकमा ‘होल्डिङ जोन’ बनाएको छ। कीर्तिपुरमा मात्रै १५ ठाउँमा यस्ता ठाउँ बनाइएका छन्।