३५.९३ प्रतिशतले घट्यो एभरेष्ट बैंकको मुनाफा, प्रतिशेयर आम्दानी कति ?

१४ बैशाख, काठमाडौं । एभरेष्ट बैंक लिमिटेडले चालु आर्थिक वर्षको तेस्रो त्रैमासको अपरिष्कृत वित्तीय विवरण सार्वजनिक गरेको छ। विवरण अनुसार बैंकको मुनाफा घटेको छ।

चालु आर्थिक वर्षको चैत मसान्तसम्ममा बैंकले १ अर्ब ५० करोड ७४ लाख रुपैयाँ मुनाफा आर्जन गरेको छ। जुन गत आर्थिक वर्षको सोही अवधिको तुलनामा ३५.९३ प्रतिशत कम हो।

यस अवघिमा बैंकको ब्याज आम्दानीसँगै अन्य आम्दानी घटेका कारण बैंकको मुनाफा घट्न पुगेको हो।

समीक्षा अवधिमा बैंकको ब्याज आम्दानी ३५.२५ प्रतिशत घटेको छ। त्यसैगरी, खुद फि तथा कमिशन आम्दानी २८.०६ प्रतिशत र सञ्चालन मुनाफा ३५.९३ प्रतिशत घटेको छ। चैत मसान्तसम्ममा बैंकको वितरण योग्य मुनाफा १ अर्ब ६ करोड ५३ लाख रुपैयाँ पुगेको छ।

बैंकको प्रतिशेयर आम्दानीमा पनि कमी आएको छ। समीक्षा अवधिमा बैंकको यस्तो आम्दानी १४ रुपैयाँ ३६ पैसा घटेर २२ रुपैयाँ ५० पैसामा सीमित भएको छ। चैत मसान्तसम्ममा बैंकको मूल्य आम्दानी अनुपात ३६.०२ गुणा रहेको छ भने प्रतिशेयर नेटवर्थ २३५ रुपैयाँ ७२ पैसा रहेको छ।

गत आर्थिक वर्षको अन्त्यको तुलनामा चालु आर्थिक वर्षको सोही अवधिसम्ममा बैंकको चुक्ता पूँजी ५ प्रतिशत बढेको छ भने जगेडा कोष १९.१९ प्रतिशत बढेको छ। त्यसैगरी, बैंकको निक्षेप ८.४४ प्रतिशत र कर्जा ७.२८ प्रतिशत बढेको छ।

गत आर्थिक वर्षको चैत मसान्तको तुलनामा चालु आर्थिक वर्षको सोही अवधिसम्ममा बैंकको निष्क्रिय कर्जा ०.०८ प्रतिशतविन्दु घटेर ०.१२ प्रतिशतमा सीमित भएको छ।