अब नेपालबाट कतार जान ४८ घण्टाकाे पीसीआर रिपोर्ट चाहिने

१४ बैशाख, काठमाडौं । अब नेपालबाट कतार जान ४८ घण्टाभित्रको पीसीआर रिपोर्ट मात्र मान्य हुने भएको छ । नेपालसहित ६ मुलुकबाट कतार जाने यात्रुको साथमा अब ४८ घण्टाभित्रको पीसीआर परीक्षणको रिपोर्ट मान्य हुने भएको हो ।

कतारको दोहास्थित नेपाली दूतावासका अनुसार कतार सरकारको जनस्वास्थ्य मन्त्रालयले सोमबार विज्ञप्ति जारी गर्दै यस्तो जानकारी गराएको हो । जारी विज्ञप्ति अनुसार नेपालसहित भारत, बंगलादेश, पाकिस्तान, श्रीलंका र फिलिपिन्सबाट आउने यात्रुका लागि कडा नियम बनाइएको छ ।

यी सबै देशबाट आउने यात्रु अनिवार्य १० दिन होटल क्वारेन्टाइन वा १४ दिन मेकाइनिस क्वारेन्टाइनमा बस्नुपर्नेछ । यो प्रावधान कतारमा खोप लगाइसकेका व्यक्तिलाई समेत लागू हुने भएको छ । कतारलाई ट्रान्जिट बनाएर अन्य मुलुकमा यात्रा गर्ने यात्रुको साथमा समेत कोभिड नेगेटिभ आएको रिपोर्ट हुनुपर्छ ।

आफ्नो गन्तव्य मुलुकका लागि अर्को पीसीआर रिपोर्ट चाहिएमा कतारी रियल ३०० तिरेर हमाद अन्तर्राष्ट्रिय विमानस्थलमै पीसीआर परीक्षण गर्न सकिने भएको छ । यो नियम बिहीबारबाट सुचारु हुने छ ।