कोरोनाबाट कर्णालीमा थप तीन जनाको मृत्यु

१५ बैशाख, सुर्खेत । कर्णालीमा थप तीन जनाको कोरोना संक्रमण भई मृत्यु भएको छ । सुर्खेतमा २ र दैलेखमा एक जना गरी तीन जनाको मृत्यु भएको हो । प्रदेश अस्पताल सुर्खेतमा उपचाररत दुईजना कोरोना संक्रमित बिरामीको गएराति मृत्यु भएको छ ।

भेरीगंगा नगरपालिका–४ का ६४ वर्षीय एक पुरुष र वीरेन्द्रनगर नगरपालिका–१३ का ५३ वर्षीय अर्का पुरुषको मृत्यु भएको हो । भेरिगंगाका बिरामी बैशाख ५ र वीरेन्द्रनगरका विरामी बैशाख ११ गतेदेखि सो अस्पतालमा उपचाररत थिए ।

यस्तै, दैलेखमा पनि बुधबार बिहान ७५ वर्षीय एकजना पुरुषको मृत्यु भएको छ । कोरोना संक्रमणपछि उपचाररत दैलेखको नारायण नगरपालिका–१ पुरानो बजार निवासी ती पुरुषको मृत्यु भएको हो ।

उनलाई हिजो मात्र कोरोना संक्रमण पुष्टि भएको थियो । दैलेख कोरोना अस्पतालमा अक्सिजनसहित उपचार गराइए पनि उनको निधन भएको बताइएकाे छ । यो सँगै कर्णालीमा कोरोनाबाट मृत्यु हुनेको संख्या ३८ पुगेको छ ।