प्रम आईसाेलेशनमा नरहेको दाबी

१६ वैशाख, काठमाडौं । हिजो धेरैवटा अनलाईन पोर्टलमा एउटा खबर भाइरल भयो– प्रधानमन्त्री केपी ओली पनि आईसाेलेशनमा । ओली पक्षीय तीनजना केन्द्रीय सदस्यहरुमा कोरोना संक्रमण पुष्टी भएपछि यस्तो खबर भाइरल भएको थियो । ओलीपक्षका केन्द्रीय सदस्य खिमलाल भट्टराईमा संक्रमण पुष्टी भएको र उनी प्रधानमन्त्रीसँग निकट रहेर काम गरेको आधारमा ओली आईसाेलेशनमा गएको खबर सार्वजनिक भएको थियो ।

हिजो दिनभरि प्रधानमन्त्रीको कार्यालयले सो खबरप्रतिकुनै चासो देखाएन । आजभने प्रधानमन्त्रीका प्रेस सल्लाहकार सूर्य थापाले ती खबर हावादारी भन्दै खण्डन गरेका छन् ।

केही मिडियाले पूर्वाग्रही भएर यस्तो भ्रमपूर्ण समाचार सम्प्रेषण गरेको उनको भनाई छ । सामाजिक सञ्जालमा उनले यस्तो खण्डन गरेका हुन् ।

यसैगरी प्रधानमन्त्रीका स्वकीय सचिव इन्द्र भण्डारीले पनि सामाजिक सञ्जालमा आजै ओलीले केही मन्त्रीहरुसँग छलफल गरेको तस्बीर सार्वजनिक गर्दै आईसाेलेशनमा नरहेको बताएका छन् ।

तर हिजो भने प्रधानमन्त्रीको सचिवालय किन मौन भन्ने प्रश्नको उत्तर भने दुवै जनाले दिएका छैनन् ।